नेपाली स्वादको अण्डा करि

आज शनिवार, बिदाको दिनमा मस्तले नेपाली खाना बनाएर खाउँला भन्ने कत्रो योजना थियो ! त्यसोत इछ्छा भएपछि किन पछि परिन्थ्यो र, अण्डा र च्याउ किनिवरि ल्याएर मज्जाले प्याज भुटियो अनि च्याउ पनि भुटियो र उसिनेको अण्डा पनि हालियो । अब गजबको स्वाद आउने भयो कतिखेर पाक्छ र खाउँला जस्तो भएको थियो । त्यहि भएर नेपाली जिरा मसला, वेसार, नुन हालेर पकाएको । वास्ना पनि निकै मिठो आएको थियो । मन थाम्न गाह्रो भएको थियो । सँगै रहेको मेरो रुममेट सुजन, दुई जना कोरियन पाहुना (भन्साको पाहुना मात्र नि फेरी ) सन इम र मेजुन इम पनि खानको लागि आतुर थिए । अब जाबो अण्डाको करि पाक्न के समय लाग्नु नि ! पाक्यो । मज्जाले भात हालेर करि हालेर खानलाई मुखमा के हालिएको थियो करिको स्वाद त गुलियो पो रहेछ । प्याज, र गोलभेडा बढि भएर होला भनेर अलि अलि नुन थपेर खाइयो । बिचरा सन इम र मेजुन इमले त नेपाली खानाको स्वाद त्यस्तै होला भन्ने ठानेका रहेछन् । पछि खाइसकेपछि पो त्यो अगि मैले हालेको नुनको पोका हेर्दा थाहा भो त्यो त चिनी पो रहेछ । अनि त मेजुन इम त मरि मरि हाँस्न थाली र भनी मैले त यो नेपाली खानको यस्तै स्वाद होला भनेर केहि नभनेको बल्ल अब मैले कुरा बुझेँ । हा हा हा, एकछिन रमाइलो भयो । के गर्नु अघिको करि अझै बाँकि छ, भरे बेलुका डिनरमा पनि त्यहि खानु पर्छ । बल्ल तल्ल बनाएको नेपाली खाना खन्छौँ नि । वा मन्नु पर्छ मेरो पकाउने सिपलाई ।